ايام ديسمبر

زائر

مش عرفا هيا فيها حاجة حلوة
اقرأوها يمكن تعجبكم
هيا مش تحفة اوى بس كويسة

أيام ديسمبر
^^^^^^^^^
إنت و انا
إنت و انا
إنت و انا
أيام كتير
وشهور كتير
و سنين كتير
كلها كانت ديسمبر
شهر واحد ف السنة
لكن أخير
برد و مطر وانا فيه لوحدى
الزمان
صورة جمال
وهى مشدودة بخيوط العبط
متشعلقة ف كنا وكان
المكان
عيال كتير
حوش كبير
جوة بيت
جوة حارة
عليها يافطة نحاس قديمة
السلم المكسور حدفنى جوة حجره
راجل عجوز
طبطب عليا بعين حزينة
(مش تحاسبى)
سكاكين كتير من عنده رشقت جوة قلبى
اتحفر جوايا وشه
نظرة عينيه التعبانين
وعملته بالصلصال ملك
على كرسى عرش كبير .. كبير
و عملته بالصلصال ملك
لابس حرير

كنت لسة يادوب .. يا دوب
باقدر أجيب كرسى صغير
و اطلع عليه اشب اطول
صندوق قماش أمى الكبير
و اسرق شريطة
لونها أحمر
تبقى جميلة
لو كات طويلة
و كات حرير
و اعقد فيونكة كبيرة خالص
و اخرج أطير
أسبق بنات كل الحارات
كنت لسة يادوب
بعرف .. بحس هو إيه طعم الحاجات

أول فرح

جواب صغير جوة منه ملبسة
و سؤال برىء غبتى ليه م المدرسة
حسيت ساعتها إنى بنت
ليا رسم
وليا كسم
وليا قد
و صوتى لو غنّى يشد

أول الخوف الكبير

جوة قلب الفصل ف الدرج الأخير
و إيديك بترفع حبة حبة
من تحتى ديل المريلة
كنت لسة يادوب .. يادوب
بعرف .. بحس يعنى إيه كلمة حبيب

أول خصام

أول خصام ما بينا كان
و انا بسرق الرز ف جيوبى
عشان أأكل الحمام
و انت بتصيد اليمام
بتلمه ميت جوة شنطة مخططة
كوابيس فظيعة
خوف .. قلق
قرف .. صداع
وحاجات كتير متلخبطة

أول عطش

لما ماقدرتش أقوللك
السلم المكسور حدفنى ف حجر مين
مين العجوز اللى عملته بالصلصال ملك
على كرسى عرش كبير كبير
مين العجوز اللى إتحفر جوايا وشه
و انحنى مع ضهره ضهرى
يوم ما شرحلى بنظرة واحدة
يعنى إيه راجل فقير
صحيت و نمت عجوزة زيه
جوة روحى و جوة قلبى كرمشة
و تجاعيد كتير

و الهوان

بنت الجيران
شباك جديد إتفتح على دنيا تانية
بتبص منه على فصل تانى
و درج تانى
و حلم تانى
وقرب تانى
وفرحة تانية
أصعب دموع و ايديك بتفلت من إيديا
قلبك خلاص بيروحلها
على مهلها
على مهلها و مهلك .. بموت

أول خضوع

وانا خايفة وحدى م الرجوع
و الكون شتا
و دموع كتير

إنت و انا
إنت و انا
إنت و انا
أيام كتير
و شهور كتير
وسنين كتير
كلها كانت ديسمبر
شهر واحد ف السنة
لكن أخير
برد و مطر
وانا فيه لوحدى

اكيد تقصد ان شهر ديسمبر دة شهر عظيم

شهر العظماء اللى انا منهم ههههههههههههههههههه
شهر عيد ميلادى طبعا لازم يتكلمو عنة ويحتفلو بالشهر دة كل سنة
اكيد لازم يكرمو الشهر علشانى هههههههههههههههههههههههه سبحانة اللة

» القديس اوساعينوس الجندى ايام الملك يوليانوس