يــا من كنت حــــبيبى

عدد المساهمات : 199 تاريخ التسجيل : 03/01/2010

يا من كنت حبيبى

وقت امتثالك للخروج من رحم البلاد
بتطوحك إيدين إللى عشقوك فى زمن العجز والحيلة
ودمعتين بينزفهم ضميرك
فوق خدك الفخار
بيشكلوا ف أول ملامح صورة بهتانة
ومافيش فواصل بين الدم والأسفلت
غير صوت طرى
بيهز أركان المشاعر
لما التلامذة الصبح بيحيوا العلم
ويفكوا أطراف النشيد
ما كانش لازم ترتشف عجزى
ما كانش لازم تكتشف
إنك بتشبهنى فى براءة الأشياء
لما اندلق على المريلة حبر القلم الأسود
وخانتنى أسئلة التاريخ
مين كان بيربط خطوتك بيّا
ويبلسم الجرح إللى طافح
من سنين دمى
لما ابتديت تغدر بأسرارى
وتبدل الأحلام
غنّيت لمين قبــــــــــــــــــلى
كان إصطفاك ليّا
تلبسنى أى قناع
وإداك براح تتمشى جوايا
ما بقيتش أخاف منك
دلوقت بس قدرت
أفك حصارى من بأسك
وأفلت بنفسى من إنفصام الروح
دلوقتى انا ميّت بـ واحة المجروح
ولانيش مخيّر الخداع والتيه
شجرى إنحنى لكن مالهش جذور
كان فين غرورك
لما شيّبت النهار فيّا
ولا قدتليش شمعة وأنا مدبوح
يا سكة إللى يروح
ما أصعبك والخريف بينوح
لساك يا طعم الزتون
بتطرح فى البدن شوكك
إنت إللى أبقى ولا شجر السنط
كل الطيور الغريبة ع الجسد بتحط
وتبعثر الموال
النخل لسة بينحنى للريح
يطرح سياط الوجع
والرطب تباريح
بحلمك المرهون على آخر حدود اليأس
بتحبنى قد نفسك
ولا زى الشمس
ليه النهايات السعيدة إللى انتهت بالأمس
بتصب فى جروحى
يا آخر الطيبين
نشّفت ليه الدم عن روحى
ومليت عروقى حنين
أنا إمتداد للبحر
مش للعيون إللى ضلت عن رمال شطّى
ولا للطيور المهاجرة فتواريخى
من غير ما أسافر للبراح والبوح
ما أملكش غير قلب ف بياض الفجر
وروعة الأساطير
وفى البلاد الخارجة عن طوعى
بحرس شوارع مضلمة ما أعرفهاش
شارب رضاب اندهاشك حكمة من صغرى
لكن مليش
فى اقتناص البهجة مـ الأحلام
ما أقدرش أفكك من تماثيلى الرخام
ولا أخلصك من سجن أفكارى

عدد المساهمات : 220 تاريخ التسجيل : 07/12/2009

يااااة فكرتنى بالشاعر الجليل احمد عدوية هههههههههه

قصدى الشاعر احمد حافظ وشوقى ابراهيم
فكرتنى بالذى مضى مع هؤلاء العظماء مكنتش بدخل الدرس ف ثانوى بسببهم ههههههههههههههههههههههههه
thinks doha

» حــــبيبى ...