قـــــلت لنفسى !!!

زائر

قلت لنفسي: ساعات كتيرة بفكر بفتح دفاتر وأصور ذكريات جميلة عدت وفي حبر الشوق برسمها كان في بيت صغير كله حب وحنية فجأة عصفت عواصف ، شتتت سكانه ، لونت أحجاره بقى زي القصور المهجورة ألوانها زي الرماد الحياة ماتت في ربوعها قلت لنفسي ده زي القلب اللي ينسى محبة مخلصنا الفادي يصبح رماد زي الحجر أساساته تضيع وكلها فجوات بتصيح نادت علية هتفت وقلبها ينزف أتربة تقولي حطني بدفاترك شوف ازاي بقى حالي ، سوسة الشر مزروعة تلونت بفعل فاعل مرفوع اسمه إبليس ، ده جميل زي النسمة يعدي يزرع بذرة مصيرها ضياع ، كلماتها سراب ، أركانها حقد وكراهية وملذات حياة تبهج قلوب البشر في ساعات وقتية ولحظات مزيفة ، روح انت يا فنان قلهم نبههم دول نايمين بالعسل نوم ، بعدوا عن الكنيسة ونسيوا الصلاة ، مشغول كلمة سمعتها كتير في البيت ده : مش فاضيين نروح القداس مراكبهم خشبية زي عقولهم متركبة ، يحاولوا أعضاء الكنيسة يشدوهم بس يقاوموا ، تقول ايه مبارزة في حلبة ملاكمة عضلات مشدودة تعصرهم زي القمح ، تضيع ملامحهم الملائكية ، أحوالهم تتبعثر زي أوراق الشجر في خريف السنة ، تلف السنين وتعدي وأحوالهم تزيد سوء في منهم يفوق يرجع ليسوع وبركة ترافقهم بعد التوبة وفي منهم تقول ايه قلوب حجر ، براكين تثور عليهم تحرقهم بالنار والحمم البركانية ، ما قدرتش اكمل الصورة قلت أقفل الشباك لأني بنادي بالأبواق بأعلى الصوت برفع الصلوات تعبنا خلاص من الهمة المهزومة قوموا بصوت التسبيح ربنا موجود ويقبل التوبة في أي وقت حتى ولو تعديت الستين قوموا يابشر ذوقوا طعم السعادة اشربوا من تعاليم الكنيسة الشرقية وارفعوا أعلام النصرة بقيادة الروح القدس وبصليب الفداء العجيب قوموا وانهضوا قبل فوات الأوان وليكم مني تحية كبيرة من عمق اختباري الرائع مع رب المجد الرب يبارككم جميعاً آمين